Evangile en créole du 05 mars 2025
Kréol La Rénion :
« Out papa ioi dann sokré, va arann aou sa »
Mt 6,1-6.16-18
Lévanjil Jézu, konm sin Matthieu i rakont
Lèr la,
Jézu la di son bann disip :
« Sak zot i fé pou vni domoun droit
la pa bézoin fé sa dovan domoun
pou fé romark azot.
Sankoi, la poinn rékonpans pou zot
dovan zot papa dann sièl.
Alorse, lèr ou fé in sharité,
fé pa sonn tronpèt dovan ou,
konm sa, bann lipokrit, i fé zot sinéma
dann bann sinagog dann shomin,
pou gaign la gloir i sort ansanm domoun.
Amen, mi di azot, bann na la fine gaign zot
rékonpans.
Konmsa mèm, lèrk ou fé in sharité,
fé manièr out min gosh i nior
sak out min droit i fé,
manièr out sharité la i arèt dann in sokré ;
out papa i oi dann sokré, va arann aou sa.
Lèr ou prièr,
fé pa konm bann lipokrit :
Bann na i èm ét dobout
dann bann sinagog, dann kroizé shomin,
pou bien domoun i voi zot, lèr zot i prièr.
Amen, mi di azot, bann na la fine gaign zot
rékonpans
Solman aou, lèr ou prièr,
alé dann lo piès lo plis dérièr,
tak la port,
prièr out papa lé la an sékré ;
Out papa, i voi dann sékré
va arann aou sa.
Sankoi, lèr ou fé in privasion si out manjé,
fé pa out ti pitié, konm bann lipokrit :
Zot i pran in figuir fatigué
pou bien amont lé zot zot i fé privasion si zot manjé.
Amen, mi di azot, bann na la fine gaign zot
rékonpans.
Solman, aou, lèrk ou priv manjé,
mèt lésans si la tèt, lav out figuir ;
Manièr, out privasion la, domoun i konétra pa,
rienk out papa, lé ladann fin fond out sokré ;
Out papa, li, i voi dann in fon sokré,
li va arann aou sa. »
