Evangile en créole du 29 aout 2024
Jeudi 29 Août 2024 Mc 6, 17, 29
Lèr la, Hérode, lavé donn lord kapay Jean baptiste.
Karsèr Jean mète la jol, akoz Hérodiade, la fanm son frèr Philippe,
sak Hérode mèm lavé marié ansanm.
Parlfèt, Jean lété i di :
« Ou la poin lo droi pran la fanm out frèr. »
A koz de sa, Hérodiade té ki en vé Jean, èl té i rod i manièr ou tié Jean, solman èl té i gaign pa.
Pars Hérode lavé pèr Jean :
Hérode té i koné sa té in bon moun, jist, sin, li té i pran soinJean-baptiste ;
Lèr li té fine antann Jean, Hérodeté bien anbarassé ;
kanmèm sa li té ki èm bien akout jean .
Or, in bon lokazion la prézanté, lèr, lo jour son lanivèrsèr,
Hérode la fé in féstin pou son bann zami, lo bann shèf larmé, gran-gran dimoun la Galilée laba.
La fi Hérodiade larivé, èl la dansé.
El la fé plézir Hérode ansanm son sosiété.
Lo roi la di lo jén fi :
« Domann a moin sak ou vé, ma donn aou. »
E li la fé sa sèrman la :
« Tout sak ou va domann amoin, ma donn aou, kamèm la moitié mon royonm. »
El la sorti pou di son momon :
« kossa mi sar domandé ? »
Hérodiade la di :
« La tèt, jean, sak i batiz la. »
Lo jèn fi la dépèsh vitman, artourn koté lo roi, pou fé son domann :
« Mi vé, tout suit,ou donn amoin dsi in pla la tèt Jean sak i batiz la. »
Lo roi té bien kontrarié ; solman, akoz lo sèrman, épi son bann zinvité, li la pa vouli rofiz aèl.
Lamèm, li la anvoy in gard ansanm lord amèn la tèt Jean.
Lo gard la parti koup la tèt Jean dan la jol.
La amèn la tèt, si in pla, la donn lo jèn fi, lo jèn fi la donn son momon .
Aprann sa, lo bann dalon Jeanla vni pranson kor pou mèt dann in tonbo.
©jean volsan
