Evangile en créole du 30 juillet 2024
Mardi 30 juillet 2024 Mt 13, 36-43
Lèrla,lès lo bann kantité domoun, Jésus la vni la kaz.
Son bann dalon la vni koté li pou di:
« Asplik anou bien lo parabol mové zèrb dann bitassion, la va !»
Jésus la réponn azot ;
« Sak i sèm lo bon grin, sé, lo fis de lonm ;
Lo bitassion, sé lo mond ;
lo bon grin, sé lo bann zanfan lo royonm ;
Mové zèrb,sé lo bann zanfan lo mal.
Lo zènmi la sèm azot sé, lo diab ;
Lo moisson sé la fin du mond ;
Bann travayèr sé bann zanj.
Konm i rash lo mové zèrb, pou jèt dann fé, konmsa mèm i sora lèr la fin du mond.
Lo fis de lonm va anvoy son bann zanj, la, zot va tir dann son royonm,
Tout sak la fé gaign kout kongn, ansanm bann sak la fé lo mal ; va jèt azot, dann fé lanfèr :
la nora gro pléré, lo dan va grinsé.
Alorse, bann bon moun va brié konm solèy dann royonm zot papa.
Sakli na zorèy, li antann ! »
© Jean volsan
