Evangile en créole du 24 juin 2024
Lundi 24 juin 2024 Lc 1, 57-66.80
Lèr larivé lo tan oussa Elisabeth i dové akoushé, èl la gaign in garson.
Son fami ansanm son bann voizin la konèt lo sénièr lavé amont aèl son grandèr,
son mizéricord, zot té bien kontan pou èl.
Lo uitièm jour, lo jour la sirkonsizion lo zanfan.
Zot la vouli kri lomarmay Zacharie konm son papa.
Solman, son momon la di :
« Non, va kri lo zanfan Jean ! »
La di aèl :
« la poin pèrsonn dan la fami, i apèl konsa ! »
Té i domann par sinial son papa koman li té i vé kri lo zanfan.
Li la fé amèn in tablète, dési li la marké : « Jean son nom »
Tout domoun, lété bien estomaké.
Tout suit la mèm, sa boush la rouvèr, son lang la détaké,
li té i koz, li té i gran mèrsi Bondié.
La krintiv, la kap tout domoun lo voizinaj, dann tout la réjion
la montagn la Judée, domoun té i rakont so bann zévènman la.
Tout bann sak té ki aprann sa, té ki ramass sa dann zot kèr, zot lété i di :
« Kossak i sora so zanfan la ?, »
Parlfèt, la min Bondié lété ansanm li.
Zanfan la té i grandi, son léspri té i vien for.
Li la parti viv dann dézèr zisko jour li la fé konèt son kapab Israël.
© jean volsan
