Evangile en créole du 03 juin 2024
lundi 03 juin 2024 Mc 12, 1-12
Lèr la,
Jésus la koz an parabol ansanm bann shèf lo prèt, bann scribe, èk bann zansien :
« In moune la plante bann pié rézin, la fé in palisad otour, li la foui in préssoir,
li la fé in batiman pou gardien véyé.
Apré sa, li la loué lo plantation, bann travayèr rézin, li la parti voyajé.
Ariv lèr, li la anvoy in sèrvitèr oir lo bann travayèr pou donn par lo travayèr,
son par bitassion la.
Solman bann na la kapay lo sèrvitèr, la tapé , la fé artourn lo sèrvitèr, min vide.
Alorse li la anvoy in not sèrvitèr,
sèt la, bann na la assonmé, gaskonn lo sèrvitèr.
Li la anvoy ankor in not,sèt la, zot la kiné, tié ;
apré sa in gro paké sèrvitèr ankor, zot la tap désèrtin, la tié dot.
Lété ki arèt ankor in moune : son garson, son lémé.
Li la anvoy son zanfan an dèrnié, majine : « Zot va réspèk mon zanfan. »
Solman lo bann travayèr la di rant zot :
« Voila lo léritié : anon fini ansanm lo garson,anon tié lo zanfan lo léritaj i sora pou nou.
Zot la kap lo zanfan, zot la tié, jèt son kor an déor lo plantation.Kossa lo propritèr i sava fé ?
Li va vni,
li va tié lo bann travayèr, li va donn lo bitassion dot plantèr.
Zot la pa lir sa passaj lé marké dann Lékritir la ?
Lo rosh bann masson la mèt par koté, sé li la vni lo zarboutan i tiembo toute.
Sa travay Bondié, mèrvèy dovan nout zié ! »
Or, lo bann shèf lo pèp té ki rod pou arèt Jésus,
solman zot lavé pèr la foul.Parlfèt, Zot lavé bien kompri sak Jésus lavé di lété pou zot.
Alors zot la lèss Jésus la mèm, zot la parti.
© jean volsan
