Evangile en créole du 27 mai 2024
Lundi 27 mai 2024 Mc 10, 17-27
Dann tan la,Jésus té i sa va, lèr in moun la kour vèr Jésus, tonmb ajnou la di :
« Bon mèt, kosa mi doi fé pou gaign,an léritaj, la vi pou toultan ?
Jésus i di :
« Pou kosa di moin lé bon ? La poin pèrsonn lé bon apark solman Bondié .
Ou koné lo bann komandman, :
« Tié pa pèrsonn, tromp pa out madam, alé pa volé, alé pa rakont zafèr lé pa vré dsi in moun,
fé pa lo tor kiksosoi, réspèk out papa, out momon. »
Lo moun la réponn :
« Mait, toussa la mi fé dopi tanm ti sa. »
Jésus, la poz lo zié si lo moun, la èm so moun la.
Jésus la di :
« In sèl zafèr i mank aou, alé, vann sak ou nana, donn sa bann pov ;
alorse ou nora in trézor dann sièl, aprésa, vien, suiv amoin. »
Solman,lo moun antann so bann parol la, son kèr la asonbri, la parti tout an tristès
pars li lavé bonpé lo bien.
Alorse, Jésus, ogarde otour, la di ansanm son bann disip ;
« Konm i sra difisil pou bann sak na rishès, rant dann royonm Bondié ! »
Lo bann disip lété éstomaké èk bann kozman la.
Jésus, arpran la parol la di azot :
« Marmay, konm lé difisil rant dann royonm Bondié !
lé pli fasil pou in shamo pass par lo trou in zéguï, pou in rish rant dann royonm Bondié. »
Dékonsèrté konm pa posib, lo bann disip té ki domann azot rant zot :
« Alorse, ben kissa i poura èt sové don ? »
Jésus, rogarde azot, la di :
« Pou domoun, sa la pa possib, solman, la pa pou Bondié, pars,Tout lé possib pou Bondié. »
©jean volsan
