Evangile en créole du 17 mars 2024
Dimanche 17 mars 2024
Jn 12, 20-33
Lèr la, avé, bann Grec, té an parmi bann sak lavé parti Jérusalem
pou ador Bondié lo tan la fèt Paque. Zot la koz ansanm Philippe té i sort Bethsaïde , an
Galilée laba, zot la domandé :
« Ni voudré oir Jésus. » Philippe la parti di sa André,
tou lé dé ansanm zot la parti di sa Jésus.
Jésus la di azot :
« la arivé, lèr oussa lo fis de lonm i doi èt mèt an lèr. An vérité, an vérité,
mi di azot, si lo grin lo blé i tonmb dann la tèr, i mor pa, li arèt tousèl ;
solman, si li mor, li port lo fruit an poundiak. Sak li èm son vi, li pèrd sa, la vi la,
solman, sak i détatash ansanm la vi la si in ba, li va gard la vi la pou la vi étèrnèl. Si in moun
li vé sèrv amoin, i fo li suiv amoin, alorse, la oussa , mi sora,
la ossi i sora mon sèrvitèr. Si in moun i sèrv amoin, Papa dann sièl va mèt moun la an lèr.
« Astèr mon lam lé trakassé, kossa ma di ?
Papa, sov amoin de sa, lèr la ?Non va, sé zistoman pou sa moin la ariv lèr la.
Papa, amont la gloir out nom.
« Alorse, dopi lo sièl, in voi la di :
« moin la amonte son gloir, moin va amont ankor. »
Antann sa, lo foul té dérièr la di : « Té sa in kout tonèr sa.dot an parmi lété ki di :« in lanj la
koz ansanm li. »
Jésus la di azot :
« La pa pou moin, la voi la, la fé antann, sé pou zot mèm.
Astèr, lé lèr jujman lo mond la, astèr, lo prins lo mond la, i sora jété déor.
Pou moin, lèrk nora lèv amoin par déssi la tèr,
moin va fé vni vèr moin tout bann domoun. »
Jésus té i di par kèl kalité la mor, li té i sa va mor.
©jean volsan
