Evangile en créole du 14 fevrier 2024
Mercredi 14 février 2024
Mt 6,1-6.16-18
Lèr la, Jésus la di son bann disip :
« Sak zot i fé pou vni dmoun droite, la pa bézoin fé sa dovan domoun
ou fé romark azot. Sankoi, la poinn rékonpans pou zot dovan zot papa dann sièl.
Alorse, lèr ou fé in sharité, fé pa sonn tronpèt dovan ou, konm sa, bann lipokrit
i fé zot sinéma dann bann sinagog dann shomin ,
pou gaign la gloir i sort ansanm domoun.
Amen, mi di azot, bann na la fine gaign zot rékonpans.
Konmsa mèm, lèrk ou fé in sharité, fé manièr out min gosh i nior
sak out min droite i fé,
manièr out sharité la i arèt dann in sokré ; out papa i oi dann sokré,
va arann aou sa.
Lèr ou prièr, fé pa konm bann lipokrit : Bann na i èm ét dobout
dann bann sinagog, dann kroizé shomin, pou bien domoun i voi zot lèr zot i prièr.
Amen, mi di azot, bann na la fine gaign zot rékonpans
Solman aou, lèrk ou prièr, alé dann lo piès lo plis dérièr, tak la porte,
prièr out papa lé la an sékré ; Out papa, i voi dann sékré va arann aou sa.
Sankoi, lèrk ou fé in privasion si out manjé,
fé pa out ti pitié konm bann lipokrit :Zot i pran in figuir fatigué
pou bien amont lé zot zot i fé privasion si zot manjé.
Amen, mi di azot, bann na la fine gaign zot rékonpans.
Solman, aou, lèrk ou priv manjé, mèt lésans si la tèt, lav out figuir ;
Manièr, out privasion la, domoun i konétra pa,rienk out papa, lé la
dann fin fond out sokré ;
Out papa, li, i voi dann fin fon sokré,
li va arann aou sa. »
jean volsan
