Saint Jean 4,45-54

Jézus la artourn la vil-Cana dann péi la Galilé, la-minm li lavé shanj de lô an vin. In fonksionèr le roi navé son garson té malad dan la vil Kafarnaüm. Ler li la aprann Jézus té ariv la Judé la Galilé, li la mont war Ali ; Li la demann Jézus désann kafarnaüm pou géri son zanfan té apo mort.

Jézus la di Ali :

" lé pa posib krwar si ou la pokor war in signe sinonsa in zafer i gagne pa espliké ?"

Lö fonksionèr lö roi la di Ali : " Sénièr, vyin, alon désann avan mon zanfan i ferm lö zié? "

Jézus la réponn ali : " ou pé alé, ardésann aoû estèr, out garson lé vivan"!
Le moun-la la krwar vréman la Parol Jézus la di ali, apré li la ardésann son kaz.

Kan li té désann, son bann servitèr la mont rozouinn dann shemin, ali pou di ali son zanfan lé vivan !
Li la domann té kel hèr li té mië. Bana la di ali : " hièr, l'apré-midi bon'hèr, sa fièv la fané."

Lö papa la kompri té lèr la-minm Jézus la di ali : " ton garson lé vivan".
Sé là li la krwar, é tout' son servitèr, son moun-la-kour la krwar osi.

Sa té lë dezièm signe Jézus la fé, lèr li la artourn la Judéité, péï la Galilé.


Pou réfléshi, pou fé in prièr :

Jézus i fé ankor in signe dann péi la Galilé : li lavé fé dë d'apré sak Sin-Zan i di !
Lö promié, li la shanz dö lö an vin,
É là, l'ot-dézièm, li géri lö zanfan in fonksonèr lö roi.

Lö proméï, té in signe, pou pa la fèt-mariaz i fini an pitié... Li ékout la demann son Monmon, Marie.
Sak là li donn la gérizon, li ékout la demann lö papa le zanfan.

Jézus la di lö fonksinèr li pé pa krwar si néna pwin' signe !

Parol Jézus i di la sé in port li rouver pou nou rant dan la foi.
Li di pou krwar, nou la bezoin in Signe..
Li di pa ni mirak, mé in Signe, é sa sé in nafer i ariv dann out vi.

Lér Jézus la di lö fonksonèr artourn son kaz, son zanfan lé vivan,
Nou koné pa byin kosa li té mazine dann son ker, pars Jézus la pa désann ansanm li...konmsi la abanön Ali, la pa ékout son demann.
Mé sé ler son servitèr i di Ali, son zanfan lé vivan, sé là li kompran lö Signe
É li krwa, et tout son servitèr osi va konprann le Signe, é zot i Kroi Jézus.

Nou osi nou néna dé Signe Bondié, Jézus la donn anou.
Sà sé pou nou rant dann son shemin la vi, nou pé fé le pa.

Sénièr,
Donn anou lë Signe out Lamour.
Kisoi pou pou aranj nout ti vi tou-lé-zour,
Kisoi pou donn anou inn gran grâs,
Kisoi pou donn anou la santé,
Rouver nout vi dann Léspérans out limièr,
Nou va war klèr,
Nou va war Lamour ou la alim dann nout ker,

Amen


source :Jean Denis FERRERE op

Posté le : 31/03/2014