Saint Luc 18,9-14
Jézus lavé rakont in zistoir an parabol pou do moun té Kroi pou vréman zot té just é an minm tan té mépriz tout do moun :
'In zour, navé dë moun la monté pou alé ansanm lö tamp pou la prièr.
Navé inn té pharizyin, é lot, té inn moun té aminn la vie.
Lö pharizyin la poz ali an prièr, é li té di dann son ker : " Bondié-Sénièr, mersi, gran-mersi, pars mwin lé pa konm do moun : Mwin lé pa volèr,
Mwin lé la injust, Mwin lé pa volaj, é mwin lé pa konm sö boug i aminn la vi lé terlà...
Mwin mi fé le jeûn dë-fwa la semèn, é mi kotiz in dizièm tout sak mi gagne.
Le boug té aminn la vie, li, li té ress dann son kwin é li té pèr lèv son zié o syiel ;
Li té bat si son lestoma, li té di :
"Bondié, pran pitié d' mwin, agard lé péshër mi lé" !
Lèr le boug-la la rant son kaz,
Ali minm, amwin i di azot, li lé devnu just, mé pa lot promié.
Lö moun i met ali an lèr, sra rabésé,
Lö moun i rabèss ali, va mèt ali an lèr !"
Pou réfléshi, pou fé in prièr :
Souvan défwa, nou mazine, pou èt bon, fo nou fé komparézon nout vi ansanm sak lé zot.
Bé la vi lé pa in konpétision ! Minm si toultan nout sosiété met sa dann nout tèt, konmsi sé ni nafer normal...
Pars la kompétision i fé pa lamitié ant domoun, o kontrèr i aminn la zalouzi, i aminn batay, la traïzon, é i fé grandi santman do moun ot our lé an tro, amoins i gagne exploit azot.
Mé, rozaman, dovan BonDié rozaman shak moun sé son lémé,
É manièr Bondié i yinm, li prann nout'tout konm son zanfan.
Li lé lö Papa la kréé tout pou nou,
Nou lé son zanfan, é konm son zanfan-byinémé Jézus !
Rod avansé, rod avans devan Bondié é kompar anout ansanm lé zot, an plüs si nou mépriz azot... Kosa i aport.. Nou mèt anou pli o lë plu fèb !
Sa pa in shemin la vie, sa la la ni shemin l'amour !
Jézus i di dann in Parol : vyin parfé, konm lö Papa dann Syiel lé parfé.
Si nou lé kapab rogar koman Bondié lé bon, lé parfé,
Nou va konpran koman i fé pou vni just... Pars Bondié i yinm ler nou rant dann son shemin konm do moun just, bon, konm do moun i estim do moun,
konm qbonDié li minm i estim do moun...son zanfan.
Bondié amont anou kisa ou lé,
Bondié, amont anou vréman out ker koman lé bon, koman lé just,
Bondié ou koné nou lé déformé dann nout têt, ou koné koman nout ker lé an rosh,
Fé bwar anou dann kré la sours out Lamour ék out Jusitis,
Amen.
source : Jean Denis FERRERE op
Posté le : 28/03/2014
