Saint Luc 11, 14-23

Jézus té apo shass in démon té dann in moun parl-pa. Lèr le démon té fini sorti, le parl-pa la komans kozé, é tout do moun té an-revyin pas !

Soman, dé-sertin la komans di :
"Sa lé par Béelzéboul, lö shef démon, li lé kapab tir démon !".

Néna d'ot, pou agass Ali ankor plis, té domann Ali in signe i sort dann syel.

Jézus, té koné Kosa navé dann zot têt, la di azot :
"Tout royôm lé divizé i vyin in dézer, tout kaz i dégrinn lézinn sü lézot.
Si Satan, li osi, lé divizé, koman son royôm va ténir ankor dobout ?
Zot i di, sé par Béelzéboul mi shass démon.

Bé si par Béelzéboul mi shass azot, zot disip, par kisa bana i shass azot ?
Pou saminm, bana minm sra zot juje.

Soman, si sé par le doigt Bondié mi shass le bann démon, sé à-byin war, lë temps Bondié lé arivé pou zot.

Soman, si inn pli for i pass dövan é i ramport, li va tir son l'armada la guèr té donn ali konfians, pou donn tout zafer li lavé prann.

Sak lé pa ansanm mwin, lé kont Mwin !
Sak i rassanm pa ansanm Mwin, i fân tout !

Pou réfléshi, pou fé in prièr :

Jézus i rann in moun la Parol, é Li donn lö moun la Parol.

Sa sé pa inn ti mirak, sa sé in manièr rann in moun la liberté,
La liberté sak li pans, li pe di aster.

Lé normal mirak là i déranz - é bana i di, bé li shass démon !..

In parl pa !
Pou in parl-pa lé minm pa bezoin koz dan son do, ou pé di a li sak ou vé, fé support ali tout sak ou vé, li gagne pa répété, li néna pwin la Parol.

É nou koné lé fasil rann in moun parl-pa.
Dann nou sosiété konméla, néna ryink samin : lö systèm i rann dö moun parl-pa.
Zordi, kinm soi-dizan i di néna la kominkasion, do moun néna l'obligasion ferm zot boush.
Fo pa di sak zot i pans ; zot néna lö drwa di in solman dö moun néna pwin lö droi kozé konm zot !
Di pa zot soufrans, zot martyr.... Zot i perd zot travay !
Di pa zot traka, zot langwas : sinon i donn azot médicaman,
Di pa zot i pri Bondié ; sinon di pa zot lé krwayan : i rod in bébêt pou tir dési zot sinon i anvoy azot lopital..

Alla ! La byinvënu zot tout dann nout "Royôm do moun Parl-Pa" !

Non va !

Jézus li vé rann la Parol, li vé donn la Parol.
Sé son manièr aport la vi.
É sé konmsa nou konprann dann lévanzil lèr i di Jézus la shass in démon sinonsa li la shass lö diab ...
Sé ler Jézus i rann la liberté in moun,
Ler li tir dann ker do moun sak ti-feu ti-feu i tié Ali, i ampèsh ali viv, grandi, èt lib..
Ler Jézus i rann la va vi, Li liber.

Li amont surtou kisa i lé lö bann démon, lö bann Béelzéboul :
Sé domoun minm avec zot lespri lesplwatasion,
Avek zot manièr domininé, ékrazé, kasé,
Zot manièr fé konmsi zot i Wa pa, zot i antan pa,
Pouk domoun i vyin domoun parl-pa.

Sénièr,
Rann la parol tout do moun lé mayé dann fardo i ampèsh azot existé, kozé, viv, grandi é viv dan la joi,
Donn anou ou LespriSin la liberté,
Donn anou la fors pou fé l'unité,

Amen !

source : Jean Denis FERRERE op

Posté le : 28/03/2014