Saint Matthieu 21,42-46.

Jésus té di lö moun té ekout Ali :
" Zot la po'kor lir dann lékritir ?
La rosh bann konstrukter la jette par koté,
Sé el estér la pierre-sous-basman.
Saminm travay Bondié, lö pli gayar zafer dövan nout zié !

Mwin néna enkor in nafer pou di azot :
Lö royom Bondié s'ra pu dann zot main - va trapé pou met dan la main in peup sra kapab fé port son fruit."

Bann shef lö prètr ansanm bann pharizien, lèr té antann parabole Jésus té rakont, té kompran byin son kozman té viz zot.

Zot té rod in manièr pou fé trap Ali - soman zot lavé peur la foule - pars pou la foule, Jésus té in prophèt.

Pou réfléchi, pou fé inn prièr :

Jésus i rakont parabol, li koz en zimaz,
Sa sé in manièr di lé shoz,
Sé in manièr fé réfléshi.

Li lavé rakont bana in zistoir in roi lavé in karo résin, é la donn do moun pou okupé.
Bana la pran pou zot dizon !!
Zot té vé Pa le garson lö roi té vyin domann son kont.
Pou fini zot la tié Ali,
É pou ashevé, lö roi, à son tour, la envoy son bann solda pou fini ansanm sö bann mové servitèr.
Aprésa la donn le karo la vigne d'ot servitèr.

Nou kompran mié akoz navé dé-troi té pa kontan kozman Jésus la di là.
Pars sé konmsi Jésus la di azot an-fass,
Zot la akapar Bondié,
Zot la akapar tout Zafer la roligion, la Parol, lë sérémoni, la sagess, l'organisasion ansanm tout lé zoeuv... konmsi Estér lé azot,
É an plis zot lé kapab di sé zot néna la vérité, sé azot toutsala !
... Ziska si i dömann azot bé pou Kosa, pou kisa zot i fé sa, i riskab di :
"tout 'la roligion zé dé zistoir lontan, aster sé zot i komann!"

Zafer Komsa i exist osi zordi, pou ni byin gran malèr ! Dann la vi toutlézour, konm dann légliz, konm dann d'ot roligion osi !

Bondié,
Aoû nout Papa dann syel,
Donn out légliz rotrouv son dignité,
É trouv do moun i aminn byin la mission la Vie, la Misérikord ék la zoi, dann la Foi ék la Konfians dann out L'amour - dann out Légliz,
dann l'monn antié, dann l'océan Indien, dann nout l'Ile La Rénion.

É nou domann aoû la Fors et la Joie out L'Espri-Sin pou nout Pap François ; li la fête son premié l'ané o servis out gran-karo la vigne.

Merci Bondié

source : Jean Denis FERRERE op

Posté le : 28/03/2014