Saint Matthieu 23, 1-12

Jésus té i di la foule la domoun ansanm son bann Dalon :

Do moun la roligion ansanm bann pharisien i fé le maitre si le trône Moïse !
Ma di azot : azot, pratik byin é akout byin tout sak bana i di.
Solman, suiv pa banna dann zot manièr fé !
Pars bana i di fé, mé zot minm zot i fé pa !

Bana i anmare gro-paké byin lourd, aprés sa i mét su zépol do moun ;
mé zot-minm, srès ék zot ti doigt, zot i toush minm pa !

Ler zot i fé kekshoz, sé pou fé remark azot devan domoun ;
Bana i met joli linge ansanm philakterè, la toil-dantel, ansanm gran-frange pou gagn-l'honer,
Bana i rod touzour la plas-gran-zinvité kan néna in ropas,
Banna i rod la plas promié rang dann synagog,
Banna i yinm rod la rokonésans si la plas-publik,
Banna il yinm do domoun i apel azot "gran-maître" !

Mė zot ! Azot !
Pa bezoin rod fé apel azot Maitre : konm Maitre, zot i doi la konésans néna un sèl ; an-plis, oubli zamé, zot tout-lé-frère !

Donn pa persôn konm nom : Père
Zot néna in sèl Père : Nout-Papa-Dann-Syel !

Pa bezoin fé apel azot gran-maître, pars zot néna in-sèl Gran-Maître : le Christ

Lö pli gran ant-zot, sra lö servitèr,

Lo moun i vé èt anlèr, ( i vé fé mèt ali odsü-lézot) , li sra rabéssé,
Lo moun va rabèss Ali, li sra anlèr,

Pou reflechi, pou fé inn ti prièr:

Jésus i donn anou in manièr war la vie, in manièr vive,
Li di anou rode pou nout vi ni shemin la simplisité,
É surtou, i di anou mazine pa domoun lé tou-puisan.

Shemin li amont anou i fé konprann anou
Dabor inn, dann shemin Bondié, fo nou avansé ansanm Bondié nout sel Maitre.

Aprésa, Jésus i rouv in shemin la liberté pou aprann domoun, met domoun zot plas.
Dann la vie, dan lo monde, néna in-ta domoun i mazine, lö pouvoir zot la gagne traper, i donn azot le droit marsh si lé-zot,
Lo pouvoir i fé zot i fé travay domoun, zot i gagne paye domoun, zot i gagne gouvern in péi, in letropriz ou byin sa in l'organisasion, i donn azot le droit ékrazé :
Domoun konmsa i réklam i cri azot maître, grand maître, sinonsa ''Mesieu" !!!

Jésus i di non : domoun na pwin le droit ékrazé lé-zin-lé-zot.
O krontrèr : shershe l'honer in moun dann le simp servis dé-zin-dé-zot !

É, konm Maître, néna in-sel : Bondié nout Papa dann Syel.

Ségnèr, ler ou la bouge dann vant nout Monmon, la Vierge Marie,
El la shant in joli shant : lö magnificat
La di lö zanfant el i port dann son vant, i vyin aminn la zustis, la vie, la vérité, la paix, ansanm l'ordre su la ter...
" ansanm son bras, Bondié i shavir bann puisan, i kass zot trône.."

Ou koné domoun lé ankor krasé zordi Sénièr,
Zot lé krazé par domoun i mazine zot lé puisant, zot néna le droit la vie ék le droit la mort sü do moun,
Lèv out bras la justis pou mèt la justis dan nout monde :
Dann travay do moun, dann famy domoun, dann ker domoun,

Amen

source :Jean Denis FERRERE op

Posté le : 28/03/2014